《九隻小鴨》
有日因為工作關係，少有地通咗晚頂，重見天日後梗係一支箭行去車站返屋企。途經位於 Sergels Torg 嘅 Stockholm 地標，發現有人群聚集圍觀，咁我都停低睇吓發生咩事。
有地盤職員喺地標底下嘅水池入面，唔出奇呀，嗰帶一路有工程做緊，個地標都封咗好耐，啱啱先開返無耐，可能又有嘢要整。留心望一望，原來仲有啲動物拯救隊嘅人喎。對眼再 zoom 埋去，原來有隻水鴨媽媽帶住八隻 BB 都喺入面喎。🦆🐤🐤🐤🐤🐤🐤🐤🐤
原來地盤職員已經發現呢班鴨仔兩日㗎啦，擔心佢哋會當咗個水池係棲息地但附近又無食物來源。加上旁邊仲有唔少工程，影響佢哋所處環境之餘，又經常有重型車輛出入，班鴨仔行出行入都有危險。
其實有好幾次啲 BB 唔識死游到池邊跌咗落地面，好彩比啲工人救返。而且嗰度真係市中心嘅最中心，四圍都係建築又的確唔適合班鴨 BB 生活嘅。於是就決定召來動物拯救組織「Svenska Djurambulansen」。
動物拯救組織 Svenska Djurambulansen 於二零零八年由 William Wright 成立。佢有朝返工路上見到隻比車撞傷嘅貓，即刻打去唔同政府部門求助。但無人可以幫到佢，於是佢自己車隻貓去睇獸醫。William 覺得既然無人會為呢啲身處危難嘅動物負責，決定自己成立一個動物拯救組織。至今組織每年接逾一萬三千宗求助個案，出勤次數數以千計。
唔講咁多，即刻去片先啦！
事件擾攘咗好耐，班鴨仔四圍游花園玩到班人類陀陀擰。中途捉到啲，但後來比佢哋走甩晒 😂 不過最後都任務完成。拯救員判斷啲 BB 出世只有兩三日，即刻將佢哋移送去適合佢哋生活嘅沼澤。而喺食花生嘅時候我都有同身邊嘅大叔討論吓：
我：好似都幾大陣仗咁喎😐
阿叔：班友仔驚佢哋無嘢食呱😎
我：無嘢食佢哋自然走㗎啦😌
阿叔：係囉係囉，點解當初無嘢食佢哋又會嚟嘅呢🧐
我：係呢可🤡
阿叔：同埋唔知佢哋點入去個水池嘅呢🤔
望一望，池邊高度都上到膝頭對落。鴨媽媽就可以由地面半飛半跳入去姐，班 BB 又點入去嘅呢😱
見證過呢個《九隻小鴨》故事之後，就明有時點解瑞典地盤做嘢好似咁慢。原來個個都係菩薩心腸嘅施主，為咗拯救蒼生，只好犧牲工程進度。
嚟緊超強颱風「山竹」打到嚟香港，人就識走去民政事務總署臨時庇護中心暫避，動物就只能被動地等待被發現。大家呢兩日留意吓街頭嘅流浪貓狗，聯絡相關組織帶佢哋去安全地方暫避，等佢哋安全渡過呢個風暴。
Search